Bu gün Azərbaycanda İqtisadi Zonaların İnkişafı Agentliyinin idarəetməsində olan sənaye zonalarında 12,1 milyard manat dəyərində məhsul istehsal olunub ki, bunun da 3,9 milyard manatı (təqribən 32,2 faizi) ixraca göndərilib.

Bunu İqtisadiyyat Nazirliyi yanında İqtisadi Zonaların İnkişafı Agentliyinin (İZİA) İdarə Heyətinin sədri Seymur Adıgözəlov 2023-cü il üzrə fəaliyyətinin yekunlarına həsr olunmuş mətbuat konfransında deyib.

"2023-cü ildə sənaye zonalarının rezidentləri tərəfindən 3,3 milyard manatlıq məhsul satılıb ki, bunun da 989 milyon manatı ixraca göndərilib. 2022-ci illə müqayisədə satışlar 12,5 faiz artıb. Bu dövrdə sənaye zonalarının qeyri-neft sənayesi məhsulları istehsalında xüsusi çəkisi 18,6%, ixracında isə 23,6% təşkil edib.\

Sənaye zonalarında istehsal olunan məhsullar dünyanın 65-dən çox ölkəsinə (Kanada, ABŞ, BƏƏ, Çin, Hindistan, İsrail, İspaniya, İtaliya, Avstriya, İngiltərə, Brazilya və s. ölkələrə) ixrac edilib", - deyə o qeyd edib.

Qeyd edək ki, İqtisadi Zonaların İnkişafı Agentliyi Azərbaycan Respublikası Prezidentinin Sənaye parklarının, sənaye məhəllələrinin və aqroparkların idarə edilməsinin təkmilləşdirilməsi ilə bağlı tədbirlər haqqında 2021-ci il 22 yanvar tarixli 1257 nömrəli Fərmanı ilə "Sumqayıt Kimya Sənaye Parkı" MMC-nin bazasında dövlət hüquqi şəxsi kimi yaradılıb.