Həmyerlimiz, tibb elmləri üzrə fəlsəfə doktoru Samir Sabir oğlu Cavadov 1979 - cu ildə Göyçay şəhərində anadan olub. 1996 - ci ildə Göyçay şəhər M. Füzuli adına 6 saylı orta məktəbi, 2002 - ci ildə isə Azərbaycan Tibb Universitetini bitirib. 2002 – 2003 - cü illərdə Samir Cavadov Bakı şəhər 4 saylı klinik xəstəxanasında internatura keçib. 2003 - 2009-cu illərdə Azərbaycan Tibb Universitetinin Klinik Mikrobiologiya Laboratoriyasında həkim işləyib. 2009 - cu ildə S.Cavadov “Limfoblastik leykemiyalı xəstə uşaqlarda sistem xarakterli mikozların etiopatogenetik xüsusiyyətləri” mövzusunda dissertasiya işini müdafiə edib, 2010 – cu ildə isə tibb üzrə fəlsəfə doktoru elmi dərəcəsinə yiyələnib. 2009 - 2014-ci illərdə Azərbaycan Tibb Universitetinin Mikrobiologiya və immunologiya kafedrasında assistent və baş müəllim kimi fəaliyyət göstərib. 2014 - cü ildən bu günə qədər həmin kafedrada dosent vəzifəsində çalışır. 2010 - 2020 - ci illərdə S.Cavadov ATU-nun Mikrobiologiya və immunologiya kafedrasında Elmi işlər üzrə kafedra müdirinin müavini, ATU-nun Tədris Terapevtik Klinikasının Mərkəzi Diaqnostik laboratoriyasının şöbə müdiri, Universitetin Doktorantura və dissertantura şöbəsinin müdiri vəzifələrində çalışıb. Hazırda ATU – nin Tədris və Təhsildə keyfiyyət təminatı şöbəsinin müdiridir. Doktor S.Cavadov həm də Dövlət İmtahan Mərkəzində rezidentura bölməsi üzrə mikrobiologiya fənnindən ekspert kimi fəaliyyət göstərir. Hal-hazırda doktor S.Cavadov tibb üzrə elmlər doktoru elmi dərəcəsi almaq üçün “Azərbaycanda Hepatit B virusunun genotipik xüsusiyyətləri” mövzusunda dissertasiya üzərində çalışır. İngilis, rus, türk dillərində danışır. Azərbaycan Respublikasının Prezidentinin 2021-ci il 9 aprel tarixli Sərəncamı ilə S.Cavadov “Tərəqqi” medalına layiq görülüb. 2018-ci ildə nəşr olunan “Microbiology and İmmunology (Laboratory manual in general microbiology)” dərsliyinin və 50-dən çox elmi məqalələrin müəllifidir. Həmyerlimizə işlərində uğurlar arzu edirik.