Cənubi Qafqazda sülhün bərqərar olması və gələcəkdə tam təmin edilməsi üçün 7 fevral seçkilərinin əhəmiyyətini vurğulamaq lazımdır.

Bunu Azərbaycanda fevralın 7-nə təyin edilmiş Prezident seçkiləri ilə bağlı secki-2024.a-a açıqlamasında polşalı politoloq, ekspert Yakub Koreyba bildirib.

Koreyba növbədənkənar Azərbaycan Respublikası Prezidenti seçkilərinin dövlətimizin gələcəyi üçün əhəmiyyətinə toxunub: “Azərbaycandakı seçkilər təkcə daxili siyasət nöqteyi-nəzərindən deyil, həmçinin beynəlxalq münasibətlər kontekstində olduqca vacib hadisədir. Azərbaycan elə bir coğrafi məkanda yerləşir ki, bu dövlətin daxilində baş verən proseslər ölkə vətəndaşlarının həyat və taleyi ilə yanaşı ətraf ölkələrin də vəziyyətinə təsir edir. Gördüyümüz kimi, dondurulmuş münaqişələr çox qısa vaxt ərzində aktiv fazaya keçir və tez bir zamanda yeni münaqişələr meydana gəlir.

Ölkənin hazırkı siyasi kursu qorunub saxlanılsa, Azərbaycanın təhlükəsizliyi təmin ediləcək. Ölkənin inkişafı üçün sülhün təmin edilməsi ilkin şərtlərdən biridir, sülh olmadan iqtisadi inkişafa nail olmaq mümkün deyil”.

Ekspertin sözlərinə görə, postsovet məkanında suverenliyin təmin edilməsi məsələsi açar məqamlardan biridir: “Qərbdəki ölkələr buna qeyri-adi baxır. Çünki heç vaxt belə problemlə üzləşməyiblər, heç vaxt suverenliklərini itirməyiblər və onların ərazilərini kimsə işğal etməyib. Polşa ilə Azərbaycanın tarixi oxşar olduğu üçün biz sizi gözəl başa düşürük. Biz də imperializm, işğal və müharibə ilə üzləşmişik. Hazırkı reallıqlara baxanda görürük ki, dünyanın güc mərkəzləri olan dövlətlər müxtəlif regionları öz təsiri altına salmağa çalışır. Azərbaycan isə bir daha izah etdi ki, onun ərazilərini nəzarət altında saxlamağa çalışan qüvvələr öz niyyətlərini həyata keçirə bilməz”.

Yakub Koreyba dost Azərbaycan xalqına xoş arzularını çatdırıb: “Azərbaycan daim yeniliklər və modern həllər axtarışındadır. Ölkə öz xüsusiyyətlərini qoruyub saxlayıb. Son 30 il ərzində baş verən proseslərə baxmayaraq, dövlət öz mövcudluğunu qoruyub saxlamaqla yanaşı böyük inkişaf tempinə nail olub. Azərbaycana daima güclü olmağı arzu edirəm”.