Göyçayda şəhid ailələri və qazilər üçün iftar süfrəsi açılıb.

Əvvəlcə şəhidlərin xatirəsi bir dəqiqəlik sükutla yad edilib.Mərasimdə şəhidlərin ruhuna dualar oxunub, on bir ayın sultanı olan Ramazanın fəzilətlərindən, bu ayda görülməsi vacib sayılan xeyirxah əməllərdən, savab işlərdən söz açılıb.

Şəhid Ailələrinə «Qayğı» cəmiyyətinin Göyçay rayon şöbəsinin sədri,şəhid övladı Eldəniz Rüstəmov Vətən müharibəsindən, Azərbaycan Ordusunun qazandığı şanlı Qələbədən, şəhidlərin gənclərə nümunə olan qısa, lakin şərəfli ömür yolundan söz açıb.Bildirilib ki,torpaqlarımızın ərazi bütövlüyü uğrunda şəhid olanlar heç zaman unudulmayacaq, onların əziz xatirəsi qəlbimizdə daim yaşayacaq.

İftar süfrəsində şəhid valideynləri, qazilər çıxış edərək onlara göstərilən diqqət və qayğıdan razılıqlarını, rastlaşdıqları problemlərin yerində həll olunduğunu bildirib, göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.